|
Revista
|
|
Studimi, si iu dhurua Greqisë hapësira detare
Studimi 117 faqesh i Kolonel Myslim Pashaj, pjesë të të cilit janë botuar sot ekskluzivisht në "GSH" synon të bindë Kuvendin për të mos ratifikuar marrëveshjen shqiptarogreke për delimitimin e kufijve detarë.
TIRANE- Marrëveshja shqiptaro-greke për përcaktimin e kufirit detar mes dy vendeve shkel hapur sovranitetin kombëtar të Republikës së Shqipërisë, ndaj ajo nuk duhet ratifikuar nga Parlamenti”. Ky është konkluzioni i një studimi prej 117 faqesh të ish-drejtorit të Institutit Tipografisë Ushtarake të Shqipërisë, kolonelit Myslym Pasha, njëherësh profesor me gradën shkencore “Kandidat i shkencave”, i lauruar me titullin “Mjeshtër kërkimesh”.
Marrëveshja, për përcaktimin e vijës së re të kufirit detar të Shqipërisë me Greqinë, u firmos në muajin prill nga ministrat e Jashtëm, Lulzim Basha e Dora Bakojanis.
“Gazeta Shqiptare” boton sot ekskluzivisht pjesën më pikante të këtij studimi, i cili thellon më tej skandalin që fshihet në këtë marrëveshje, të depozituar tashmë për ratifikim në parlament.
Detajet e këtij studimi- shkruan sot GSH- nxjerrin në pah paaftësinë e qeverisë shqiptare për të mbrojtur sovranitetin e Shqipërisë, duke pranuar firmosjen e një dokumenti që cënon ujërat kombëtare në detin Jon me rreth 354.4 km2, të cilat i “dhurohen” fqinjit tonë jugor. Rezultatet e studimit tregojnë se pala shqiptare nuk ka shtruar asnjë argument dhe nuk ka kundërshtuar ndonjë tjetër. Thjesht janë pranuar pa asnjë kusht dhe kundrejt asnjë kontestimi të gjitha propozimet e kërkesat e palës greke. Qeveria shqiptare, me vetëdije ose për paaftësinë e ekspertëve të saj të Ministrisë së Mbrojtjes dhe asaj të Punëve të Jashtme tenton tani të ratifikojë me shumicë votash këtë dokument.
Në datën 25 qershor, Komisioni Parlamentar i Ligjeve vetëm me votat e 11 deputetëve të maxhorancës dhe pa praninë e opozitës miratoi këtë marrëveshje dhe tani pritet që fjalën e fundit ta thotë seanca plenare e 19 tetorit. “Studimi në argumentet e tij teknikë, gjeohartografikë, synon si hap të parë krijimin e një opinioni mbarëkombëtar, për të mos e ratifikuar këtë Marrëveshje”, - shprehet profesor Pasha.
Skandali u denoncua nga “Gazeta Shqiptare” që në firmosjen e marrëveshjes. Me ndihmën e një eksperti topograf, “Gazeta Shqiptare” arriti të zbardhë në muajin prill ‘09 faktin tronditës që fshihet në marrëveshjen shqiptarogreke “Për delimitimin e zonave përkatëse të shelfit kontinental dhe zonave të tjera detare që përkasin në bazë të së drejtës ndërkombëtare”. Vija e re kufitare që ndan ujërat territoriale të dy shteteve, e që përbëhet nga 150 pika, rezulton sipas ekspertit topograf se ka prirjen për t’u futur në drejtim të Karaburunit, pra në dëm të Shqipërisë, me afërsisht 11 km.
Mos perdorni komentet per te bere pyetje, mund te mos merrni pergjigje. Shkruaje pyetjen tende tek Pyetje dhe Pergjigje
Komento i pari kete artikull!
