|
Revista
|
|
"Speciale" Pedofili: Ja si e vrava Julianin. E ëma dhe i vëllai: Të varet në litar
TIRANË - Ardian Prenjasi pranon në polici: “Kam vrarë 11-vjeçarin Julian Çela”. Dëshmia rrëqethëse konfirmohet nga burime të Policisë së Tiranës për TV "NEWS 24".
Një ditë pas arrestimit, Ardian Prenjasi, cilësuar tashmë si ‘monstra e Laprakës’ është dërguar në banesën e tij në këtë zonë për të rindërtuar në prani të hetuesve skenën e krimit, ku si ka thënë vetë i ka marrë jetën 11-vjeçarin, Julian Çela, i zhdukur 3 muaj me pare.
Por vrasja e Julianit u zbulua vetëm pas rrëmbimit dhe abuzimit që kreu pedofili me një 10-vjeçar, të cilin vetëm fati e shpëtoi nga kthetrat e monstrës. 10-vjeçari A.C është mbajtur peng dhe abuzuar seksualisht për 24 orë në një shtëpi në Laprakë, nga maniaku seksual Ardian Prenjasi.
A.C. u denoncua si i zhdukur nga familjarët e tij pasditen e së shtunës dhe vetëm të dielën, policia ka mundur ta gjejë të miturin dhe ta lirojë nga "kthetrat" e maniakut seksual, i cili, pasi e kishte abuzuar, po përpiqej t'i merrte dhe jetën.
Zbulimi shokues, u bë nga miqtë e Prenjasit, punëtorë në Ndërmarrjen e Pastrim-Gjelbërimit, të cilët kishin "mësyrë" në shtëpinë e këtij të fundit, për shkak se prej dy ditësh ai mungonte në punë dhe nuk dinin asgjë për fatin e tij. Pasi kanë thirrur në emër të tij dhe s'kanë marrë përgjigje, ata kanë hyrë në shtëpi përmes dritareve, ku kanë zbuluar krimin makabër.
Por, krimet e Ardian Prenjasit duket se nuk paskan fund. Prokuria ngre dyshimet se një tjetër fëmijë është bërë pjesë e veprimtarisë kriminale të Prenjasit. Sot policia vijon kerkime intensive për gjetjen e trupit të të miturit, Julian Cela, djali i nendrejtorit të Antiterrorit në SHISH.
Një ditë më parë, Prenjasi tha se trupin e vrarë të Julianit e hodhi të mbështjellë me batanije në kazanët e plehrave dhe pa sesi makina e mbeturinave e mori bashkë me plehrat. Sot monstra shton dëshminë e tij duke theksuar se trupin e kontrolloi dhe e gjeti në Sharrë. Ai tregoi me gisht dy vende në Sharrë, ku sipas tij është hedhur trupi i Julianit.
Ndërsa Ministria e Drejtesise nisi po sot procedimin ndaj dosjes gjyqësore të pedofilit në vitin 2008.
NËNA E PEDOFILIT: E KEMI BËRË LANET. FËMIJËT E TJERË I KAM TË PAFAJSHËM
Ora 14:50-Sanije Prenjasi, e ëma e Ardian Prenjasit shprehet për News24 se fëmijët e saj të tjerë nuk kanë kryer asnjë krim.
“Për krimet të përgjigjet vetëm Ardian Prenjasi. E kemi bërë lanet të gjithë”.
BANORET E PRRENJASIT KERKOJNË DENIMIN ME TE RENDE PER PEDOFILIN VRASES
Ora 14:38 - Banorët e qytetit të Prrenjasit, ku ka jetuar për një kohë të gjatë pedofili Ardian Prenjasi, vazhdojnë të jenë të shokuar nga zbulimi i krimeve të tmerrshme të kryera nga 45-vjeçari ndër vite.
Ndërsa kërkojnë që drejtësia të jetë e pamëshirshme në dhënien e masës ekstreme të dënimit për pedofilin vrasës, qytetarët e Prrenajsit lëshojnë akuza të ashpra ndaj policisë, prokurorisë dhe gjykatave që nuk e kanë vlerësuar rrezikshmërinë e shfaqur jo në një por në disa raste të monstrës Ardian Prenjasi.
Ne foto kerkimet per Julianin ne Sharre
DYSHOHET SE PRENJASI KA ABUZUAR EDHE ME NJË DJALË QË I LIHEJ NË KUJDESTARI
Ora 13:05- Ndërsa vijojnë hetimet intensive për gjetjen e trupit të 11-vjeçarit Julian Cela, policia ka ngritur të tjera dyshime që lidhen me pedofilin Ardian Prenjasi. Mësohet se 45-vjeçari kujdesej shpesh për djalin e mitur të shoqes së bashkëjetueses së tij, me të cilin dyshohet se ka abuzuar seksualisht. Mësohet se policia po heton edhe mundësinë që Prenjasi të ketë pasur edhe bashkëpunëtorë.
I ZOT I BANESËS KU JETONTE PRRENJASI: ZOTI MË PASKA RUAJTUR FËMIJËT
Ora 12:40-Lefter Muka, i zoti i banesës ku jetonte me qera Ardian Prenjasi shprehet i tronditur rreth ngjarjeve që kanë ndodhur në banesën e tij. Muka theksoi se fati ka shpëtuar fëmijët e tij.
“Nuk e di si mi ka ruajtur Zoti fëmijët. Nuk e imagjinoj dot se çfarë ka ndodhur aty. Unë nuk dija gjë, goca më telefonoi dhe më tha që policia ka ardhur në shtëpi. Shkova, me tha policia a ke çelës të banesës, ju thashë që nuk kam një çelës. Ata shpërthyen derën. Nuk e di çka ndodhur aty, tani do shkoj të shoh çfarë ka ndodhur në banesën që jepja me qera”.
Muka tha se nuk kishte miqësi me Prenjasin. “Jo nuk e njihja mirë, thjesht jetonte një kat sipër meje”.
FLET PËR "NEWS 24" DJALI I TEZES SË JULIAN CELËS
Ora 11:30- Algert Sella, djali i tezes së viktimës, Julian Çela pohon për "News 24" se pedofili vrasës ka dhënë 2 vende ku mund të ketë groposur viktimën. “Policia nuk ka filluar ende gërmimet. Ai ka treguar 2 vende që thotë se i ka hedhur, nuk dimë gjë më tepër. Ai thotë se ka 2 vende dhe ne deri tani kemi pritur. Një gropë e madhe në Sharrë dhe një më lart. Dje tha ndryshe që e hodhi në një kosh mbeturinash, sot tha që i ka hedhur trupat vetë në Sharrë. Ne duam drejtësi, atëherë nëse nuk e venë ata, të na i lenë në dorë dhe i vemi ne drejtësi”, tha djali i tezes së viktimës.
PROKURORI: PRENJASI PO HETOHET EDHE PËR DHUNIMIN E NJË FËMIJE TJETËR
Ora 11:20-Gazetari Spartak Koka bën të ditur se prokurorët kanë ngritur një sërë dyshimesh se përvec Julian Celës, fëmijës A.C, një tjetër fëmijë në Tiranë është dhunuar nga Prenjasi.
LIRIMI I PEDOFILIT NË VITIN 2008, MINISTRIA E DREJTËSISË: DO VERIFIKOJMË DOSJEN
Ne foto gjyqtarja Shefkie Demiraj, dha gjoben per Prenjasin
Ora 11:00- Ministria e Drejtësisë do të verifikojë vendimin e dhënë nga gjykata në 2008 ndaj Ardian Prenjasit, ku akuzohej për rrëmbimin e një fëmije.
Burime nga Ministria e Drejtësisë pranë News24 thanë se pritet që inspektorët të sekuestrojnë dosjen ndaj Prrenjasit.
"Ministria e Drejtësisë nis inspektimin në Gjykatën dhe Prokurorinë e rrethit Gjyqësor Tiranë për çështje penale në ngarkim të shtetasit Adrian Prenjasi.
Pas ngjarjes tronditëse të ndodhur dje në Tiranë ku një mitur u dhunua dhe e mbajt peng nga shtetasi Adrian Prenjasi dhe një tjetër (sipas dëshmisë së autorit dhënë organeve të policisë) është vrarë prej tij dhe pasi u njoh me faktin se ky shtetas është dënuar me gjobë nga gjykata, për veprën penale të të “heqjes së paligjshme të lirisë” ndaj një tjetër të mituri Ministri i Drejtësisë ka kërkuar menjëherë inspektimin në Prokurorinë dhe në Gjykatën e Rrethit Gjyqësor Tiranë për rastin në fjalë”., citon ne nje deklarate te saj Ministria e Drejtesise.
Sipas Ministrisë së Drejtësisë, inspektimi do të kryhet nga Drejtoria e Përgjithshme Çështjeve të Drejtësisë me objekt kontrollin e veprimeve procedurale në procedimin penal nr.1623, viti 2008 në ngarkim të të pandehurit Ardian Prenjasi, i akuzuar për veprën penale të “heqjes së paligjshme të
lirisë” parashikuar nga neni 110/1 i K.Penal, me hetime paraprake të përfunduara me vendim dërgimi për gjykim. Përfunduar së gjykuari me vendimin penal nr.1555 datë 14.11.2008 të Gjykatës së Rrethit Gjyqësor Tiranë.
Të gjitha rezultatet e inspektimit do ti bëhen te ditura opinionit publik brenda një kohe të shkurtër.
PROKURORIA KËRKON MASË ARRESTI PËR PRENJASIN VETËM ME AKUZËN E RRËMBIMIT TË FËMIJËS
Ora 10:30- Prokuroria kërkon masë arresti për Prenjasin vetëm për akuzën e rrëmbimit të fëmijës, A.C. Sipas prokurorisë, trupi i Julianit nuk është gjetur.
PEDOFILI DËRGOHET NË SHTËPI E SHARRË, DO RINDËRTOJË SKEMËN SI E VRAU JULIANIN
Ora 10:00-Një ditë pas arrestimit, Ardian Prenjasi, cilësuar tashmë si ‘monstra e Laprakës’ është dërguar në banesën e tij në këtë zonë për të rindërtuar në prani të hetuesve skenën e krimit, ku si ka thënë vetë i ka marrë jetën 11-vjeçarin, Julian Çela.
Dërgimi i tij në banesë në Laprakë është bërë nga forcat e policisë, në masa të rrepta sigurie.
I dënuari me parë për pedofili ne Greqi është çuar në banesën ku jetonte me qira, pranë familjes se viktimave të tij të fundit, ku në prani të hetuesve do të rindërtojë skemën e vrasjes së vogëlushit Cela.
Pas dërgimit në banesë, Prenjasi është dërguar dhe në Sharrë për të treguar ku mund të jetë fshehur trupi i Julianit të vogël.
FAMILJARËT E PEDOFILIT VRASËS "NGUJOHEN" NË SHTËPI
Ora 09:00-Në lagjen nr 1 të qytetit të Prrenjasit jeton prej afro gjysëm shekulli familja e pedofilit vrasës Ardjan Prenjasi. Të tronditur nga krimet e 45- vjeçarit monstër, i dëbuar për këtë shkak nga familja rreth 15 vite, ata sapo kanë dëgjuar lajmin e tmerrshëm janë " ngujuar" në banesën e tyre pasi i druhen hakmarrjes.
Derën e shtëpisë që nga pasditja e të dielës ia kanë hapur vetëm policisë dhe për momentin për gjithkënd përfshi edhe të afërmit, të futesh aty duket gati një mision i pamundur. Për pak kohë me nënën dhe me dy prej tre vëllezërve të tij të pranishëm në banesën e tyre, kemi mundur të komunikojmë natën vonë gjatë të dielës pa kamera dhe aparat fotografik si të dërguar të "News 24" dhe 'Gazeta Shqiptare".
18 MARS - E ËMA: MOS IA DËGJOFSHA EMRIN, VARENI NË LITAR
Ora 07:00 - Fill pas arrestimit të "monstrës", 45-vjeçarit Ardian Prenjasi, familjarët e tij i bënë thirrje drejtësisë të japë dënimin maksimal për të. Dy vëllezërit, nënën 75-vjeçare dhe motrën, i gjejmë në shtëpi. Ndërsa kanë mbyllur dyer dhe dritare, ata vetëm qajnë e mallkojnë. Në një prononcim për "GSH", e ëma, Sanije Prenjasi tha se i biri ishte dënuar në Greqi për pedofili me 4 vjet burg. Edhe atje, akti monstruoz ishte kryer ndaj një fëmije të një çifti emigrantësh shqiptarë. "Që pas kthimit nga ushtria kemi konstatuar devijime. Është dënuar në Greqi për pedofili me 4 vjet burg.
Pas kthimit që andej, kujtuam se u rehabilitua, u fejua. Kur ishte në prag të martesës, një rast tjetër ndodhi në Prrenjas. E denoncuan sërish, filloi procesi gjyqësor, por nuk është dënuar", - tregon e ëma. Edhe vëllezërit e 45-vjeçarit "monstër", Besnik dhe Fabian Prenjasi pohojnë se ai është denoncuar për pedofili, madje dyshohet të jenë 4 raste në Prrenjas. "Që atëherë e dëbuam nga shtëpia. Ka ardhur vetëm një herë për një sebep, me këmbënguljen e gjithë fisit. Prej një viti e gjysmë u lidh me një vajzë të mirë dhe menduam se do martoheshin dhe s'do kishte më probleme", - shprehen ata.
Familja kërkon nga drejtësia që ta varë në litar Ardianin. "Nuk kemi për t'ia parë më bojën. Ishalla e dënojnë sa më shpejt, me dënimin më maksimal. Na ka çnderuar, na ka varrosur të gjallë dhe nuk dimë se si ta ngushëllojmë atë familje që ka humbur djalin", - thotë Sanije Prenjasi. I vëllai Besniku shkon më tej: "Nuk e meriton t'ia përmendim më emrin. Plumbi është pak. T'ia presin mishin copa-copa. Jo vetëm që ka bërë krime ndaj tyre, por edhe ndaj nesh. Kur dëgjova për krimin, mendova si të më kishte ndodhur për fëmijën tim", - shprehet vëllai Besniku.
RRËFIMI TRONDITËS I ‘MOSTRËS’: JULIANIN E VRAVA DITËN QË E RRËMBEVA, E HODHA NË PLEHRA
Ora 21:57- Zbulohen detaje të reja dhe tronditëse nga rrëfimi i 45-vjeçarit Ardian Prrenjasi para Policisë së Tiranës.
“E kam vrarë Julian Çelën që ditën që e rrëmbeva më 30 nëntor, pasi sapo e futa në shtëpi filloi duke bërtitur. Nuk e njihja më parë, por e futa në shtëpi pasi i thashë të më blinte një paketë cigare.
Trupin e kam mbështjellë me një batanije dhe e kam hedhur në koshin e plehrave pranë shtëpisë në një kohë kur erdhi makina e grumbullimit. Kam qëndruar në këmbë në cep të rrugës dhe kam parë kur makina mori koshin ku kisha hedhur kufomën dhe e hodhi në karrocerinë e saj. Më pas kam hyrë i qetë në shtëpi”,- kjo ka qenë dëshmia e Ardjan Prenjasit për grupin e hetimit.
Zgjidhet kështu në mënyrë tragjike misteri i zhdukjes së djalit të Nëndrejtorit të Antiterrorit në SHISH, Skënder Çela, i cili rezulton i zhdukur prej 30 nëntorit të vitit 2012.
45-vjeçari i arrestuar mesditën e djeshme si autor i rrëmbimit të 10-vjeçarit me iniciale A.Cani ka dhënë dëshminë rrëqethëse për të miturin Julian Çela në Komisariatin Nr. 3 Tiranë. Gazetari i TV "NEWS 24", Spartak Koka raportoi se Prenjasi, pasi ka pranuar krimin ai fillimisht nuk ka dhënë detaje për vendin ku mund të ketë fshehur kufomën e të miturit si dhe as rrethanat e vrasjes.
Ardian Prenjasi, baba i 3 fëmijëve, i divorcuar, është kapur dje në flagrancë, pasi pasditen e se shtunes kishte rrëmbyer një tjetër fëmije 10-vjeçar, të cilin po bëhej gati ta vriste të dielen, në shtëpinë ku jetonte me qera në Laprakë.
Ardian Prrenjasi rezulton si person me precedentë penal, pasi është akuzuar se ka abuzuar seksualisht me të miturin si në shtetin grek ashtu edhe në vendlindjen e tij Librazhd.
RASTI I JULIAN ÇELËS
Jualin Çela, djali i nëndrejtorit të Antiterrorit në SHISH, rezultonte i zhdukur prej 30 nëntorit 2012. 11-vjeçari ishte shpallur në kërkim ndërkombëtar.
Për herë të fundit, 11-vjeçari Julian Çela është parë në një qendër interneti në rrugën “Pandi Dardha”. Pronarja e qendrës së internetit ka treguar për "News 24" se dikush e kishte kërkuar Julianin të dilte nga interneti, e që nga ajo ditë askush nuk e ka parë më.
"News 24" dhe 'BalkanWeb' njoftuan që prej ditës së parë për humbjen e të miturit dhe apelin e babait me shpresë për gjetjen e djalit. Të afërm të Julianit në "Facebook" shpërndanë foto të djalit të vogël me shpresën se dikush do ofronte ndonjë të dhënë.
“SKANDALI”, GJYKATA DËNOI VETËM MË GJOBË ‘MOSTRËN’ PËR RRËMBIMIN E NJË TË MITURI
Gjykata e Tiranës në nëntor të vitit 2008 ka dënuar vetëm me një gjobë prej 600 mijë lekësh shtetasin Ardian Prrenjasi, i cili akuzohej atë kohë për rrëmbimin e një fëmije.
Ndërkohë që kjo neglizhencë ka bërë që sot në vitin 2013, Ardian Prrenjasi të përdhunonte një fëmijë si dhe të rrëmbente dhe vriste Julian Çelën, 11-vjeçarin e zhdukur në nëntor 2012.
NDËRPRITEN KËRKIMET NË SHARRË
Ora 21:30 Ndërpriten kërkimet në zonën e Sharrës, për gjetjen e kufomës së Julian Çelës. Vështirësitë për shkak të errësirës kanë bërë që ekspertët të ndërpresin kërkimet për ti rinisur sërish në orët e para të mëngjesit të ditës së hënë, së bashku me autorin e krimit.
VËLLAI I ‘MOSTRËS”: MERITON TË VRITET
Ora 21:00 “Vëllai im meriton të vritet”. Kështu e ka dënuar Besnik Prenjasi, veprimin e të vëllait Ardian Prenjasit, i cili ka abuzuar seksualisht me një të mitur, ndërkohë që sot doli në dritë krimi monstruoz me 11-vjeçarin Julian Çela.
Në një prononcim për "News 24", Besniku rrëfen se Ardiani ka pasur probleme mendore që pas kryerjes së ushtrisë, ndërkohë që familja ka 15 vite që e ka dëbuar.
“Ardian Prenjasi ka pasur probleme që pas kryerjes të ushtrisë. E kemi dëbuar nga shtëpia që prej 15 vitesh. Nuk kemi komunikuar me Ardianin. Meriton të vritet. Ai ka qenë i dënuar me 4 vite në Greqi”, shprehet i vëllai.
BURGAJ: SHPËTUAM 1 FËMIJË NGA MOSTRA
Ora 20:20 Kreu i Policisë së Shtetit Hysni Burgaj nga Komisariati Numër 3 u shpreh se reagimi i shpejtë i policisë shpëtoi nga kthetrat e mostrës Ardian Prenjasin një tjetër fëmijë, teksa shtoi se detaje të reja do bëhen në orët në vijim për fatin e kufomës së Jualin Çelës, viktimë e maniakut serial të fëmijëve.
“Mund të them është një reagim shumë i shpejtë i policisë lidhur me parandalimin e një ngjarjeje tjetër të rëndë nga një mostër. Të dhëna të tjera do i merrni me detaje më vonë. Ardian Prenjasi është edhe vrasësi i Julian Çelës.
KËRKIMET E POLICISË NË SHARRË
Ora 20:00 Në familjen Çela janë hapur dyer e mortit ku familjarë dhe miq kanë shkuar për tu gjetur pranë prindërve të vogëlushit Julian Çela, ndërkohë që pak minuta më parë mësohet se familjen e ka vizituar edhe Hysni Burgaj, kreu i Policisë së Shtetit për ngushëllimet e rastit.
Gazetari i TV "NEWS 24" Mariglen Mërtiri raporton se policia po vijon kërkimet intensive për gjetjen e kufomës së 11-vjeçarit në zonën e Sharrës, pasi maniaku vrasës Ardian Prenjasi ka dhënë detaje për vendodhjen e trupit të pajetë. Ndërkohë, forca të shumta policie po mbledhin provat të tjera në banesën e 45-vjeçarit.
ÇAUSHAJ: PO PUNOJMË PËR GJETJEN E TRUPIT TË JULIAN ÇELËS
Ora 19:30 Strukturat e Policisë së Tiranës kanë ndaluar shtetasin Ardian Prenjasi, i cili kishte fshehur në banesën e tij një të mitur 10-vjeçar, të larguar një ditë më parë nga shtëpia, si dhe për vrasjen e të miturit 11-vjeçar, Julian Çela, i zhdukur prej 30 nëntorit të vitit 2012.
Në një deklaratë për shtyp, pasditen e së dielës, Drejtori i Policisë së Tiranës, Bernard Çaushaj, u shpreh se “në bashkëpunim me sektorin e Statistikës dhe Informacionit Kriminal në Drejtorinë e Policisë së Qarkut Tiranë, u arrit të siguroheshin informacionet e para për shtetasin me tendenca kriminale të abuzimit me të miturit. Nga këto informacione rezultoi se shtetasi Ardian Prenjasi, 45-vjeç, lindur në Prenjas dhe banues në Laprakë, kishte të dhëna dhe më parë për abuzime seksuale me të mitur. Në vlerësim të këtij informacioni, në banesën e tij u gjet i fshehur fëmija 10-vjeçar dhe shtetasi Ardian Prenjasi. Në cilësinë e provës materiale iu gjetën një litar dhe një thikë që janë përdorur për t'i bërë presion të miturit”.
Drejtori i Policisë së Tiranës informoi gjithashtu se "falë një pune intensive dhe të mirëorganizuar, në një kohë rekord, policia grumbulloi provat e mjaftueshme dhe të pakontestueshme se shtetasi Ardian Prenjasi është autor i dyshuar i vrasjes dhe fshehjes së trupit të të miturit Julian Çela, 11-vjeç, i cili rezulton i zhdukur prej 30 nëntorit 2012”. Çaushaj bëri të ditur se policia do të vazhdojë punën për zbardhjen e plotë të veprimtarisë kriminale të këtij shtetasi dhe gjetjen e trupit të të miturit 11-vjeçar Julian Çela.
GJENDET 10-VJEÇARI I ZHDUKUR. AUTORI DYSHOHET SE KA GISHT EDHE NË RASTIN E JULIAN ÇELËS
Ora 15:15 10-vjeçari me iniciale A.C i zhdukur që prej ditës së djeshme gjendet në banesën e komshiut të tij Ardian Prrenjasi në zonën e Laprakës. Burime nga Policia e Tiranës bëjnë me dije se vogëlushi u gjet në banesën e Ardian Prenjasit, ndërkohë që dyshohet se është mbajtur 24 orë nën presionin e dhunës fizike dhe psikologjike. Po të njëjta burime dyshojnë se 45-vjeçari ka kryer veprime të turpshme me pengun, duke e abuzuar seksualisht.
Ka patur dyshime të familjarëve dhe fqinjëve mbi 45-vjeçarin që kanë venë në lëvizje policinë, pasi banesa e tij ndodhet pranë familjes Cela. Mësohet se 45-vjecari, i cili punonte shofer në ndërmarrjen e pastrim gjelbërimit në Bashkinë e Tiranës, prej dy ditësh nuk ishte paraqitur në punë. Kolegët të cilët kanë tentuar të futen nga dritarja e banjos së shtetasit Ardian Prenjasi kanë ngjallur edhe dyshimet tek familjarët dhe komshinjtë e 10-vjecarit të zhdukur, të cilet kanë sinjalizuar policinë për ketë fakt.
Strukturat e policisë menjëherë pas dyshimeve të ngritura kanë ndërhyrë me forcë mesditën e sotme, në ambientet e banesës së Ardian Prenjasit babai i tre fëmijëve, i divorcuar nga Librazhdi që prej disa muajsh jetonte me një femër në Tiranë. Gjatë momentit të arrestimit ai është kapur me një thikë dhe litar në dorë. Arma e ftohtë dhe litari me të cilin është kapur në flagrancë ka bërë që blutë e Tiranës të ngrejnë dyshime se 45-vjecari kishte si qëllim edhe vrasjen e fëmijës.
Nga hetimet paraprake mësohet se 45-vjecari Ardian Prenjasit, dyshohet edhe për zhdukjen e Julian Çelës, djali i nëndrejtorit të antiterrorit në SHISH, Skënder Çela, i cili rezulton i zhdukur prej 30 nëntorit 2012.
DYSHIMET PËR JULIAN ÇELËN
Ka të dhëna të sigurta që ka elementë në banesën e Ardian Prenjasit edhe të 10-vjeçarit Julian Çela, i cili prej nëntorit të vitit 2012 rezulton i zhdukur. Sipas burimeve të policisë po bëhet ekzaminimi i plotë dhe ka dyshime që 45-vjeçari ka rrëmbyer edhe Julian Çelën, pasi dy fëmijët jetojnë vetëm 100 metra larg njëri-tjetrit në zonën e Laprakës.
BABAI: NUK E NJOH ARDIAN PRENJASIN
Pas gjetjes së të birit, të zhdukur Sajmir Cani në një prononcim për "News 24" deklaron se nuk e njeh Ardian Prenjasin dhe nuk ka asnjë ide sepse mund të ketë grabitur djalin e tij. Cani rrëfen se 10-vjeçari humbi dje rreth orës 17:30, dhe menjëherë ai ka bërë denoncimin në polici. Cani shton se Ardian Përrenjasi prej 1 viti jeton në zonën e Laprakës, por ai nuk ka asnjë kontakt me të.
"Dje nga ora 17:30 ka dalë të lozë me shokët. Dhe nga ora 19:00 dolëm ta kërkojmë në internet në lagje, bëmë denoncim dhe policia na ndihmoi dhe e gjetëm. Komshi i jonë është, por nuk e njohim. Nuk e di sa kohë banon pranë nesh. Kur e mësuam nuk dinim ç’të bënim. Çdo gjë ja lemë në dorë policisë dhe drejtësisë, djali është në shkollë në klasë të katërt", u shpreh babai i 10-vjeçarit.
GJYSHJA: JEMI HABITUR
“Nuk di gjë, jemi habitur. Këtë njeriun nuk e njoh. Djali kishte gjysëm ore që kishte humbur. Gjysëm ore ka qenë i humbur dhe pastaj babai ka dalë për të gjetur. Ne jemi të ardhur nga Burreli”, u shpreh gjyshja.
DËSHMITARËT: 45-VJEÇARI AFRONTE FËMIJËT
“Kam dyshuar se erdhi mbrëmë një grua 12:30 të natës. Pastaj, sot erdhën punëtorët e ndërmarrjes së vet. Dhe na thanë se kanë humbur. Aty dyshova. Punëtorët e ndërmarrjes erdhën u futën nga banjo. Unë i pyeta dhe ato më thanë njëri ka munguar dje tjetri ka dy ditë që nuk kishte shkuar në punë aty dyshova unë. Unë nuk e kam njohur, ka 3 vjet që ka ardhur”,- u shpreh një tjetër dëshmitar.
“Ka dy tre muaj që banon këtu. Ai nuk fliste me njëri. Erdhën punëtorët e ndërmarrjes e kërkuan për punë, hapën dritaren e banjos dhe ne aty dyshuam. Lajmëruam policinë se nuk u hap dera. E shoqja nga Peshkopia kishte ik tek shtëpia vet. Ai ishte i afrueshëm me fëmijë, i conte me ble paketa, gjëra. Fëmijët i afronte të gjithë sikur thonin, i qeraste”, tha një dëshmitar tjetër, i cili se 10-vjeçari e njihte 10-vjeçarin tjetër Julian Çela pasi banojnë në të njëtën zonë.
“Unë jam komshiu ngjitur. Dje në darkë nëna ime 70-vjeçare ka parë një femër pranë banesës së tij dhe një makinë. Ajo e ka pyetur nënën time se ç’bënte natën dhe nëna i tregoi se po kërkonin një djalë të humbur. Pas 5 minutash nëna tha se e pashë femrën që iku me makinë”, u shpreh një tjetër komshi.
Mos perdorni komentet per te bere pyetje, mund te mos merrni pergjigje. Shkruaje pyetjen tende tek Pyetje dhe Pergjigje
Komento i pari kete artikull!
