Zëri Amerikës: Basha pranon paketën McAllister, Rama është tërhequr

Zëri i Amerikës ka raportuar përpjekjet që po bëhen mes partive politike për gjetjen e një zgjidhje për krizën.

Burime për këtë agjenci kanë bërë të ditur se opozita e drejtuar nga Lulzim Basha ka pranuar paketën ‘McAllister’ dhe është tërhequr nga dy kërkesa të rëndësishme siç janë ato të kryeministrit teknik dhe shtyrjen e zgjedhjeve për në vjeshtë.

Por gatishmërisë së opozitës nuk i është përgjigjur qeveria e drejtuar nga Edi Rama, që sipas Zërit të Amerikës nuk pranon shtyrjen e datës së zgjedhjeve përtej 18 qershorit, ndonëse kjo është e parashikuar në paketën ‘McAllister’.

Raportimi i Zëri i Amerikës:

Në Shqipëri, deri në mesnatë kanë vazhduar pa rezultat përpjekjet për gjetjen e një zgjidhjeje të krizës politike në vend, të cilat rinisën pas kërkesës së djeshme të Zëvendës Ndihmës Sekretarit amerikan të Shtetit Hoyt Brian Yee, që palët të dialogonin mbi bazën e formulës së kompromisit të ofruar disa javë më parë nga kryetari i Komisionit të Jashtëm të parlamentit europian David McAllister.

Gjatë vizitës në Tiranë, zyrtari i Departamentit të Shtetit u shpreh se SHBA-të e mbështesin të ashtuquajturën “Paketa McAllister” duke e cilësuar “një propozim të ndershëm”.

Burime pranë opozitës janë shprehur se ajo ka rënë dakort plotësisht me të ashtuquajturën “Paketa McAllister”, porse sipas saj ka një tërheqje nga përfaqësuesit e qeverisë.

Në thelb bëhet fjalë për disa ndryshime në qeveri, me disa ministra teknikë që të kenë pëlqimin e opozitës, sipas formulës McAllister, e cila nuk parashikon dorëheqjen e kryeministrit, kërkuar me ngulm nga opozita.

Po ashtu, parashikohet dhe dhënia së djathtës, e drejtimit të Komisionit Qëndror të Zgjedhjeve. Ndërkohë që propozohet dhe shtyrja e datës së zgjedhjeve.

Zoti Rama nga ana e tij ka shpjeguar se as ai nuk e ka pranuar “Paketën McAllister”, por se ka qenë i gatshëm të diskutonte mbi të, me kusht që opozita të votonte anëtarët e komisioneve parlamentare për rivlerësimin e gjykatësve dhe prokurorëve.

Burime nga opozita thanë mbrëmë se ajo ka rënë dakort dhe për çështjen e Vettingut, ndonëse pala tjetër pretendon se e djathta ka kërkuar disa ndërhyrje në ligjin për rivlerësimin e gjykatësve dhe prokurorëve.

Por pika e mosdakortësisë duket të jetë data e zgjedhjeve. Opozita duket se është tërhequr nga kërkesa për shtrjen e tyre deri në fillim të vjeshtës, dhe shprehet se ka pranuar variantin e shtyrjes në 16 apo 23 korrik, kohë brenda së cilës mund të tentohet të realizohet identifikimi biometrik i votuesve, apo dhe numërimi elektronik.

Por sipas saj është kryeministri Edi Rama i cili po këmbëngul që data e zgjedhjeve të mos preket, dhe të mbetet 18 qershori. Por nga ana e qeversië nuk ka asnjë konfirmim apo përgënjeshtrim të këtij qëndrimi.

Ndërkohë përfaqësuesë të komunitetit ndërkombëtar po vazhdojnë të jenë në kontakt me palët, dhe ende asgjë nuk konsiderohet e mbyllur.

Përditësuar me 17 Maj 2017