Tetovë, vritet një kryekomunar shqiptarë

Kryetari i Komunës së Bogovinës në Tetovë të Maqedonisë, Hazbi Idrizi është qëlluar për vdekje pas një zënke verbale, e cila më pas është përshkallëzuar deri në nxjerrjen e armës.

Lajmi për vdekjen e zyrtarit shqiptar u konfirmua nga burime prane spitalit të Tetovës.

Sipas televizionit Alsat, autori i vrasjes është një ish i punësuar i Komunës me iniciale Q.A.

Raportet në mediat vendase tregojnë se Idrizi u qëllua me 6 plumba nga bashkëfshatari i tij, i cili pas gjestit ekstrem e ka kthyer armën nga vetja duke mbetur i plagosur rëndë. Ai është dërguar me urgjencë në spital, por nuk ka mundur t’u mbijetojë plagëve të marra.

Për momentin nuk ka asnjë informacion zyrtar mbi shkaqet e ngjarjes së rëndë. Bashkimi Demokratik për Integrim reagoi përmes një deklarate për shtyp duke përcjellë tronditjen e thellë nga lajmi i vrasjes se anëtarit të tij në kohën kur kryente detyrën zyrtare në shërbim të qytetarëve.

“Zemrat dhe mendjet tona në këto momente të rënda janë me familjarët dhe dashamirësit e Hazbi Idrizi”, thuhet në deklaratë. BDI ftoi institucionet përgjegjëse të zbardhin motivet e aktit të dhunës, i cili ka qenë sipas saj, i paprovokuar.

Idrizi kishte shërbyer si kryetar i komunës së Bogovinës nga viti 2000 deri në vitin 2005, e pastaj në zgjedhjet lokale të 2009-s ishte caktuar sërish në këtë post.

Përditësuar me 06 Maj 2017