Covid-19, shkon në 17 numri i viktimave

Ka shkuar në 17 numri i të vdekurve nga Korona Virusi në Shqipëri. Pasditen e sotme në Spitalin Infektiv ka ndërruar jetë një 75 vjeçar i cili kishte dhe sëmundje shoqëruese. 

Pacienti me inicialet A.C., ishte testuar dhe kishte rezultuar pozitiv me Covid19, ndërkohë që, gjendja e tij shëndetësore është rënduar në mënyrë të menjëhershme.

Pavarësisht përpjekjeve të mjekëve të Spitalit Infektiv për ta asistuar në kohë rekord, pacienti nuk ia ka dalë të mbijetojë. Ministria e Shëndetësisë dhe Mbrojtjes Sociale i shpreh ngushëllimet familjes së të ndjerit dhe u bën edhe një herë thirrje qytetarëve, që të zbatojnë në mënyrë rigoroze masat e distancimit social dhe të izolimit, të cilat janë të domosdoshme për frenimin e përhapjes së COVID-19.

Përditësuar me 03 Pri 2020